महोत्तरीमा तीनस्थान मधेशकेन्द्रित दलको पोल्टामा पर्ने सम्भावना

• राजेश बर्मा

महोत्तरी जिल्लामा पनि मधेश केन्द्रित दलको प्रभाव त्यति सारो देखिएको छैन । स्थानीय क्षेत्रहरुमा तीन ठूला राजनीतिक दलहरुबाहेक मधेशी जनअधिकार फोरम नेपाल, मधेशी जनअधिकार फोरम लोकतान्त्रिक, तराई मधेश लोकतान्त्रिक पार्टी, सदभावना पार्टी,  राष्ट्रिय मधेशी समाजवादी पार्टीबीच कडा प्रतिस्र्पधा हुने तय छ । संविधानसभाको निर्वाचनमा मधेश केन्द्रिय दलहरुमध्ये रामसपा पार्टी र सदभावना पार्टीको केही बलियो उपस्थितीका कारण यो जिल्लाबाट मधेश केन्द्रित दलहरुले तीनवटा सिट प्राप्त गर्न सक्ने अपेक्षा गरेका छन  । 

गृह जिल्ला तथा तीन दशकदेखि राजनीतिमा सक्रिय रहेका कारण महोत्तरीबाट रामसपाका अध्यक्ष शरदसिंह भण्डारीले ठूलो आश लगाएका छन । उनले आफ्नो पार्टीले कम्तीमा तीनवटा सिट ल्याउन सक्ने दावी गरेका छन ।  भण्डारी आफै क्षेत्र नम्बर १ र ६ बाट उम्मेदबार बनेका छन । यसअघिका निर्बाचनमा क्षेत्र नम्बर ६ बाटै २१ मतले बिजयी भएका भण्डारीलाई यसपटक भने क्षेत्र नम्बर १ बाट विजयी हुन सकस नै हुने बर्दिबासका मतदाता ओम श्रेष्ठले बताए । भण्डारी क्षेत्र नम्बर ६ बाट सजिलै जित्न सक्ने आँंकलन गरिएको छ । उनका अनुसार भण्डारीको उक्त क्षेत्र आफ्नो नभएकाले विजयी हुन कठिन हुन सक्छ । यसैगरी सोही क्षेत्रबाट एकीकृत नेकपा माओवादीबाट उम्मेदबारी दिएका गिरीराजमणी पोखरेललाई पनि विजय हासिल गर्न सजिलो छैन । उनका लागि भण्डारीजस्तै क्षेत्र नम्बर १ नौलो मानिन्छ । उक्त क्षेत्रमा बढी प्रभाव चिरञ्जीवि हमालको देखिएको छ । हमाल नेपाली काँंग्रेसबाट उम्मेदबारी दिएका हुन । हमाललाई नेकपा एमालेको मत जाने सम्भावना पनि त्यति नै प्रवल रहेको स्थानीय मतदाताहरुको आँंकलन छ । एमालेका तर्फबाट उम्मेदबारी दिएकी दुर्गाकुमारी दाहाल स्थानीय क्षेत्रमा त्यति प्रभावशाली नमानिएका कारण उनको मत हमाललाई पर्ने सम्भावना छ । मतदाताहरुका अनुसार हमाल, भण्डारी र पोखरेलबीच कडा त्रिपक्षीय प्रतिस्र्पधा हुने अनुमान गरिएको छ । 

यसैगरी क्षेत्र नम्बर २ मा यादब, मुश्लिम र साह समुदायको मतदाता संख्याले पनि उम्मेदबारहरुको हार जितको खेललाई निर्धारण गर्न सक्छ । उक्त क्षेत्रमा मुश्लिम समुदायको करिब ८ हजार, साह समुदायको करिब ६ हजार र यादब समुदायको करिब १४ हजार मतसंख्या छ । यही जातीय मतसंख्याले उम्मेदबारलाई पछार्ने र अघि ल्याउने उदघोष गर्न सक्छ । क्षेत्र नम्बर २ मा नेपाली काँग्रेसका तर्फबाट राष्ट्रपति डा. रामवरण यादबका भतिजी किरण यादब, एमालेका तर्फबाट मञ्जु यादब र यसअघिको निर्बाचनमा जितेका मधेशी जनअधिकार फोरम नेपालका तर्फबाट हरिनारायण यादबले उम्मेदबारी दिएका छन । सोही क्षेत्रमा एकीकृत नेकपा माओवादीतर्फ लालबाबु यादब, रामसपाबाट जयनुल राइन, तराई मधेश लोकतान्त्रिक पार्टीबाट रुपा यादब र सदभावना पार्टीबाट जानकी शरण साहले उम्मेदबारी दिएका छन । 

पहिले नेपाली काँंग्रेसको महाधिवेशन प्रतिनिधि रहेका हरिनारायण अहिले एकीकृत माओवादीमा प्रवेश गरेका हुन । सोही क्षेत्रमा उम्मेदबारी दिएकी रुपा भने उनको आफ्नै बुहारी हुन । नेपाली काँंगे्रसका अध्यक्ष रहेका जानकी शरण सदभावनामा प्रवेश गरेका हुन ।  मतदाताहरुका अनुसार ससुरा लालबाबु र बुहारी रुपाबीच कडा प्रतिस्र्पधा हुन सक्छ भने अर्कोतर्फ किरण, मन्जु र हरिनारायणबीच पनि कडा प्रतिस्र्पधा हुन सक्छ । यादब समुदायबाटै करिब १५ जनाले उम्मेदबारी परेकाले मत विभाजन भएर अन्ततः उक्त क्षेत्रमा जयनुल राइन, किरण र लालबाबुबीच त्रिपक्षीय कडा प्रतिस्र्पधा हुनेछ । 

यस्तै क्षेत्र नम्बर ३ मा भने मधेश केन्द्रीत दलमध्ये तराई मधेश लोकतान्त्रिक पार्टीका गणेश तिबारी प्रभावशाली मानिएपनि संविधान सभाको निर्बाचनमा उनी निश्कृय बसेका कारण उनी सँंग रहेको मत संख्याले उम्मेदबारहरुको भाग्य चम्काउन सक्छ । तिबारी निष्कृय बसेपनि उनीसँंग भुमिहार तथा मधेशी ब्राहम्न समुदायको करिब १३ हजार मत छ । यो मतको आधारमा उम्मेदबारहरु हार्न वा जित्न सक्छन । श्रोतका अनुसार आफ्नै समुदाय अर्थात भूमिहार वा ब्राह्मण समुदायका उम्मेदबार विजयी होस भन्ने तिबारीको चाहना छ । उक्त क्षेत्रबाट यसअघिका निर्बाचनमा हार व्यहोरेका नेपाली काँंग्रेसका रामचन्द्र तिबारी, तराई मधेश लोकतान्त्रिक पार्टीबाट रामशंकर मिश्र,  एमालेबाट रामदयाल मण्डल, रामसपाबाट हरिप्रसाद मण्डल र एकीकृत माओवादीबाट रामआधार कापैडले उम्मेदबारी दिएका छन । जातिय मतसंख्या र मत समिकरणको आधारमा को आधारमा रामचन्द्र तिबारी र रामशंकर मिश्रबीच तथा उपल्लो र तल्लो जातिय मत समिकरणको आधारमा रामदयाल, रामचन्द्र र रामशंकर र हरिबीच कडा प्रतिस्र्पधा शुरु भएको छ । 

क्षेत्र नम्बर ४ मा भने नेकाँंबाट ललनकुमार राय, एकीकृत माओवादीबाट ईन्दुकुमारी शर्मा, सदभावनाबाट सुरिता साह, संघीय सदभावना पार्टीबाट सुनिल रोहित र एमालेबाट इलियास अन्सारी, मजफो नेपालबाट किरणकुमार राय, तमलोपाबाट हरिनारायण मण्डलगायतले उम्मेदबारी दिएका छन । इन्दु यसअघिको निर्बाचनमा तमलोपाबाट विजयी भएर पछि एकीकृत नेकपा माओवादीमा प्रवे्श गरेका रामकुमार शर्माका पत्नी हुन । यो क्षेत्रमा ललनकुमार, सुरिता र इन्दुकुमारीबीच कडा प्रतिस्र्पधा भइरहेको स्थानीय मतदाताहरुले वताएका छन ।

क्षेत्र नम्बर ५ मा एमालेबाट दीपनारायण साह, एकीकृत माओवादीबाट मो. रजी हैदर, नेकाँंबाट महेन्द्रकुमार राय, तमलोपाबाट राजकिशोर मण्डल, रामसपाबाट कौशलकुमार राय, मजफो नेपालबाट राजकिशोर यादबलगायतले उम्मेदबार दिएका छन । यो क्षेत्रमा पनि ब्राह्मण र भुमिहार समुदायको करिब ११ हजार मतसंख्याले उम्मेदबारको भविष्य निर्धारण गर्न सक्छ । यो क्षेत्रमा रजी हैदर, दीपनारायण र महेन्द्रबीच कडा प्रतिस्र्पधा भएको आँंकलन गरिएको छ । यस्तै क्षेत्र नम्बर ६ मा रामसपाबाट शरदसिंह भण्डारी, नेकाँंबाट सीताराम भण्डारी, एकीकृत माओवादीबाट भरत साह, मजफो नेपालबाट सीताराम साह, तमलोपाबाट नरेशकुमार महतो र एमालेबाट कोशिलाल यादबले उम्मेदबारी दिएका छन । यसअघिका निर्बाचनमा सीताराम भण्डारी शरदसिंहसँंग २१ मतले हार व्यहोरेका थिए । यसपटकको निर्बाचनमा पनि उक्त क्षेत्रमा शरदसिंह, नेकाँंका सीताराम र भरतबीच कडा प्रतिस्र्पधा देखिएको छ ।

क्षेत्र नम्बर मतदाता संख्या   कडा प्रतिस्र्पधी 

१ ४४१८६ शरदसिंह भण्डारी, चिरञ्जीवी हमाल, गिरिराजमणि पोखरेल 

२ ४३७४२ किरण यादब, लालबाबु यादब, जयनुल हक

३ ४७२८७ रामदयाल मण्डल, रामचन्द्र तिबारी, रामशंकर मिश्र, हरिप्रसाद मण्डल

४ ४३३७५ ललनकुमार राय, सुरिता साह, इन्दुकुमारी शर्मा

५ ४४५४७ मो.रजी हैदर, दीपनारायण साह, महेन्द्रकुमार राय

६ ४४२२७ शरदसिंह भण्डारी, सीताराम भण्डारी, भरत साह

महोत्तरी, कात्तिक २२, 2070